Zyra e Këshilltarit të Posaçëm në Shtetet e Bashkuara ka nisur një hetim zyrtar ndaj ish-prokurorit Jack Smith, pas akuzave se ka keqpërdorur pozitën e tij me qëllim ndikimi politik ndaj kandidaturës së Donald Trump gjatë zgjedhjeve presidenciale të vitit 2024. Lajmi është bërë i ditur nga mediat amerikane dhe konfirmuar përmes një emaili të zbuluar nga The New York Post, dërguar nga këshilltari i lartë Charles Baldis.
Jack Smith ishte emëruar nga Prokurori i Përgjithshëm i administratës Biden, Merrick Garland, për të hetuar dy çështje madhore ndaj Donald Trump: trajtimin e dokumenteve të klasifikuara dhe rolin e tij në ngjarjet e 6 janarit 2021 në Kapitol. Megjithatë, të dyja rastet janë rrëzuar nga gjykatat federale pas rikthimit të Trump në Shtëpinë e Bardhë në janar 2025. Smith dha dorëheqjen pak pas kësaj, në të njëjtin muaj. Hetimi është iniciuar nga Njësia për Zbatimin e Aktit Hatch – një ligj federal që ndalon zyrtarët publikë të përfshihen në veprimtari politike. Senatori republikan Tom Cotton, i cili kërkoi hetimin, deklaroi se “veprimet e Smith ishin të qëllimshme dhe të drejtuara për të dëmtuar kandidaturën e Donald Trump, duke favorizuar fushatën e presidentit Biden”. Sipas tij, Smith kishte përshpejtuar hetimet në mënyrë të qëllimshme për të ndikuar në kaukuset e para në Iowa dhe në dinamikën e zgjedhjeve presidenciale, gjë që ai e quajti “abuzim të pastër të pushtetit publik”. Smith nuk ka komentuar ende publikisht për hetimin, por në deklaratat e mëparshme ka këmbëngulur se veprimet e tij kanë qenë në përputhje të plotë me ligjin dhe tërësisht të pavarura nga çfarëdo ndikimi politik.
Ky zhvillim i ri ka shtuar interesimin edhe për rastin e ish-presidentit të Kosovës, Hashim Thaçi, i cili u arrestua në prag të një vizite në Shtëpinë e Bardhë, ku pritej të firmosej një marrëveshje paqeje me Serbinë. Akuza për motivim politik të arrestimit të tij ka ekzistuar më herët në qarqet politike të rajonit, por hetimi ndaj Jack Smith – i cili mbikëqyri edhe prokurorë të tjerë amerikanë të përfshirë në çështjen Thaçi – ka shtuar spekulimet se mund të ketë pasur ndikim politik edhe në atë rast.
