Irani ka refuzuar kërcënimet e Presidentit amerikan Donald Trump, i cili paralajmëroi se mund të “shkatërrojë” infrastrukturën naftësjellëse në ishullin Kharg nëse forcat iraniane vazhdojnë të bllokojnë ngushticën strategjike të Hormuzit.
Autoritetet iraniane deklaruan të shtunën se kjo rrugë detare, nga e cila kalon rreth një e pesta e furnizimit global me naftë, është nën kontrollin e plotë të Iranit dhe se çdo anije që përpiqet të kalojë do të bëhet objektiv.
Deklarata sfiduese erdhi disa orë pasi një milici e mbështetur nga Irani pretendoi se kishte goditur Ambasadën e SHBA në Bagdad, për herë të dytë që nga fillimi i luftës. Një video e verifikuar nga New York Times tregon një strukturë në çatinë e ambasadës në flakë.
Ndërkohë, Shtetet e Bashkuara kanë bombarduar instalime ushtarake në ishullin Kharg, qendra kryesore e eksporteve iraniane të naftës. Trump deklaroi se kishte urdhëruar ushtrinë të mos godiste për momentin infrastrukturën energjetike të ishullit, por paralajmëroi se mund ta “fshijë nga harta” nëse Irani vazhdon bllokadën e Hormuzit.
Megjithatë, Garda Revolucionare Islamike e Iranit njoftoi se nuk ka ndërmend të tërhiqet dhe se nuk do të lejojë kalimin e cisternave të naftës apo anijeve tregtare të vendeve që i konsideron agresore dhe aleatëve të tyre.
