Irani lëshoi disa valë raketash drejt Izraelit, njoftoi ushtria izraelite, vetëm pak pasi presidenti amerikan Donald Trump vendosi të shtyjë për pesë ditë planin për të bombarduar centralet elektrike dhe infrastrukturën energjetike të Republikës Islamike.
Sirenat e alarmit u dëgjuan në disa pjesë të Izraelit, përfshirë Tel Avivin, ku u raportuan shpërthime nga ndërhyrjet e sistemit të mbrojtjes ajrore. Në një nga sulmet, disa shtëpi në veri të vendit u dëmtuan nga mbetjet e raketave të interceptuara, por nuk ka raportime për viktima.
Trump shkroi në platformën e tij Truth Social se SHBA dhe Irani kishin zhvilluar bisedime “shumë të mira dhe produktive” për një “zgjidhje të plotë të armiqësive në Lindjen e Mesme”. Si rezultat, ai tha se do të shtyjë për pesë ditë goditjen ndaj centraleve iraniane, të cilën e kishte kërcënuar nëse Teherani nuk rihapte Ngushticën e Hormuzit.
Megjithatë, sipas mediave amerikane, pezullimi vlen vetëm për objektet energjetike dhe operacionet ushtarake të SHBA kundër Iranit vazhdojnë.
Irani ka bllokuar praktikisht Ngushticën e Hormuzit – një korridor jetik për rreth 20% të naftës dhe gazit të lëngshëm në botë – që nga nisja e luftës mes SHBA, Izraelit dhe Iranit më 28 shkurt. Konflikti deri tani ka shkaktuar më shumë se 2 mijë viktima.
Ndërkohë, kryetari i parlamentit iranian, Mohammad Baqer Qalibaf, mohoi se kishte pasur negociata me SHBA, duke hedhur dyshime mbi pretendimet për bisedime mes dy palëve.
