Irani ka reaguar përmes një postimi në “X” ndaj deklaratave të presidentit amerikan, Donald Trump, i cili paralajmëroi se një armatim masiv po drejtohet drejt Iranit.
Në reagimin e tij, misioni iranian në OKB thekson se SHBA, gjatë përfshirjes së fundit në luftërat e Afganistanit dhe Irakut, shpenzuan mbi 7 trilionë dollarë dhe humbën më shumë se 7,000 jetë amerikane.
“Irani është i gatshëm për dialog të bazuar në respekt të ndërsjellë dhe interesa të përbashkëta – POR NËSE SHTYHET, DO TË MBROJË VETEN DHE DO TË PËRGJIGJET SI KURRË MË PARË,” shkruhet në postimin iranian.
Si pjesë e reagimit, Irani shpërndau edhe postimin e Trump, ku presidenti paralajmëronte se nëse nuk arrihet një marrëveshje, do të zhvillohet një operacion kundër Iranit:
“Një armatim masiv po drejtohet drejt Iranit. Po lëviz shpejt, me fuqi dhe qëllim të madh, e udhëhequr nga aeroplanmbajtësja Abraham Lincoln. Ashtu si me Venezuelën, është e gatshme dhe e aftë të përmbushë misionin e saj me shpejtësi dhe forcë, nëse është e nevojshme.
Shpresojmë që Irani të vijë shpejt në tryezën e negociatave dhe të arrijë një marrëveshje të drejtë – JO ARMË BËRTHAMORE – një marrëveshje e dobishme për të gjitha palët. Koha po mbaron. BËNI NJË MARRËVESHJE! Në të kundërt, operacioni i ardhshëm do të jetë shumë më i ashpër.”
