Irani është përpjekur të zbusë tensionet me Shtetet e Bashkuara dhe zemërimin e presidentit Donald Trump, duke u zotuar për pezullimin e 800 dënimeve me varje, një hap që duket se ka shmangur përkohësisht rrezikun e materializimit të kërcënimeve për ndërhyrje ushtarake ndaj Republikës Islamike.
Megjithatë, pavarësisht këtij veprimi, situata e brendshme në vend mbetet e tensionuar. Në rrjetet sociale po qarkullojnë video që tregojnë kamionë me forca të shumta sigurie duke u shpërndarë ngadalë në zona të ndryshme të Iranit, çka interpretohet si një sinjal se autoritetet nuk janë tërhequr nga përpjekjet për të shtypur kryengritjen popullore.
Protestat antiqeveritare, të cilat shpërthyen më 28 dhjetor 2025, janë shndërruar në një nga valët më të mëdha të pakënaqësisë popullore në dekadat e fundit. Mijëra qytetarë kanë dalë në rrugë në shumë qytete të vendit, fillimisht të nxitur nga kriza e thellë ekonomike, rënia e monedhës kombëtare, inflacioni i lartë dhe përkeqësimi i kushteve të jetesës.
Brenda pak ditësh, demonstratat morën një karakter të hapur politik, me kërkesa për ndryshim të sistemit dhe rrëzim të regjimit të ajatollahëve. Në Teheran dhe qytete të tjera, protestuesit kanë brohoritur thirrje si “Vdekje diktatorit”, duke drejtuar zemërimin ndaj udhëheqjes së regjimit dhe liderit suprem, Ayatollah Ali Khamenei.
Autoritetet iraniane janë përgjigjur me masa të ashpra represive, duke angazhuar forca të shumta sigurie dhe duke përdorur gaz lotsjellës, topa uji, plumba gome dhe, në disa raste, edhe municion të vërtetë. Sipas raportimeve, mijëra protestues janë ndaluar, ndërsa organizatat për të drejtat e njeriut flasin për qindra deri në mijëra viktima gjatë përleshjeve të dhunshme, në kushtet e një errësire informacioni të shkaktuar nga bllokimi i internetit në vend.
