Autoritetet indiane të certifikimit të filmave kanë bllokuar publikimin e filmit të nominuar për Oscar “The Voice of Hind Rajab”, duke argumentuar se shfaqja e tij mund të dëmtojë marrëdhëniet mes Indisë dhe Izraelit.
Sipas raportimeve të publikuara nga revista Variety, Bordi Qendror i Certifikimit të Filmave në Indi refuzoi të japë miratimin për shpërndarjen e filmit, duke i thënë distributorëve se publikimi i tij “mund të prishë marrëdhëniet Indi-Izrael”.
Filmi i regjisores tuniziane Kaouther Ben Hania rrëfen historinë e Hind Rajab, një vajzë pesëvjeçare palestineze në Gaza, e cila sipas rrëfimit të dokumentarit u vra pasi ushtarët izraelitë qëlluan qindra plumba drejt makinës ku ajo priste të shpëtohej.
Dokudrama u prit me shumë emocione në Festivalin e Filmit në Venecia, ku mori një ovacion në këmbë prej 23 minutash në premierën e saj.
Distributori i filmit në Indi, Manoj Nandwana, tha se e kishte paraqitur për miratim në shkurt me synimin për ta shfaqur në mars, por vendimi i autoriteteve e bllokoi publikimin. Sipas tij, refuzimi erdhi vetëm një ditë pasi kryeministri indian Narendra Modi zhvilloi një vizitë shtetërore në Izrael.
Prodhuesit e filmit e kanë kritikuar ashpër vendimin. Badie Ali, bashkëthemelues i kompanisë së prodhimit Watermelon Pictures, tha se censurimi i filmit ngre pyetje serioze.
“Që kur klithma për ndihmë e një vajze pesëvjeçare është kërcënim diplomatik?”, u shpreh ai, duke shtuar se censura vetëm tregon se historia e Hind Rajab ende tremb ata që janë në pushtet.
Regjisorja Ben Hania reagoi gjithashtu duke ironizuar vendimin në rrjetet sociale, duke pyetur nëse marrëdhëniet mes “demokracisë më të madhe në botë” dhe “demokracisë së vetme në Lindjen e Mesme” janë aq të brishta sa mund të prishen nga një film.
India dhe Izraeli kanë forcuar ndjeshëm bashkëpunimin e tyre vitet e fundit, veçanërisht në fushën ushtarake, ku India është një nga blerësit më të mëdhenj të armëve izraelite.
