Në një deklaratë të zyrës së kryeministrit Benjamin Netanyahu, Izraeli ka shprehur pikëllim të thellë për sulmin e forcave të tij ushtarake në spitalin Nasser në Khan Younis, Gaza.
“Izraeli shpreh pikëllim të thellë për tragjedinë që ndodhi sot në spitalin Nasser në Gaza. Izraeli vlerëson punën e gazetarëve, personelit mjekësor dhe të gjithë civilëve. Autoritetet ushtarake po kryejnë një hetim të plotë”, thuhet në deklaratë.
Po ashtu, theksohet se “Lufta jonë është kundër terroristëve të Hamasit. Objektivi ynë i drejtë është mposhtja e Hamasit dhe kthimi i pengjeve tanë”.
Ndërkohë, ka pasur një rritje të dënimeve ndërkombëtare për këtë sulm, i cili ka rezultuar në vdekjen e 20 palestinezëve, përfshirë pesë gazetarë.
Presidenti amerikan, Donald Trump, ka deklaruar se “duhet të vëmë fund këtij makthi”, ndërsa homologu i tij francez, Emmanuel Macron, e ka cilësuar sulmin si “një goditje të papranueshme”.
