Ministri i Jashtëm i Hungarisë, Péter Szijjártó, ka deklaruar se vendi i tij blen hapur naftë nga Rusia, duke theksuar se nuk ekziston një alternativë tjetër për furnizimin energjetik të Hungarisë.
Sipas tij, kritikat që po i bëhen Budapestit janë të pabaza, pasi edhe vende të tjera evropiane e blejnë naftën ruse, por e bëjnë këtë në mënyrë të fshehtë përmes kanaleve alternative, kryesisht për shkak të çmimit më të ulët.
Zëdhënësi i qeverisë hungareze, Zoltan Kovacs, citoi përmes platformës X fjalët e ministrit, duke theksuar:
“Ministri Szijjártó paralajmëroi kundër hipokrizisë së atyre që sulmojnë me zë të lartë Hungarinë dhe Sllovakinë, por importojnë fshehurazi të njëjtën naftë përmes Azisë.”
Deklaratat u bënë gjatë një takimi informal të Këshillit të Energjisë në Danimarkë, ku çështja e furnizimit me energji dhe varësia nga Rusia u diskutuan gjerësisht.
Këto komente pasqyrojnë presionin e madh ndërkombëtar që Hungaria po përballet lidhur me marrëdhëniet e saj energjetike me Moskën dhe, njëkohësisht, nxjerrin në pah praktikat e ndryshme të importit të naftës ruse nga shtete të tjera të BE-së.
