Hamas ka deklaruar se armëpushimi në Gaza nuk mund të kalojë në fazën e dytë për sa kohë që Izraeli vijon shkeljet e marrëveshjes. Sipas autoriteteve në Gaza, që prej nisjes së armëpushimit 60 ditë më parë janë regjistruar të paktën 738 shkelje nga pala izraelite.
Ndërkohë, autoritetet në Rripin e Gazës janë në proces të kërkimit për mbetjet mortore të pengut të fundit izraelit që pritet të kthehet në kuadër të fazës së parë të marrëveshjes së armëpushimit.
Sa i përket fazës së dytë të marrëveshjes, ajo mbetet ende e paqartë. Kjo fazë përfshin çështje të ndjeshme si qeverisja e Gazës, mundësia e vendosjes së një force ndërkombëtare stabilizuese dhe krijimi i një strukture të ashtuquajtur “bordi i paqes”, për të cilat palët nuk kanë arritur ende një dakordësi.
Në këtë kontekst, kryeministri izraelit Benjamin Netanyahu ndodhet nën presion të shtuar politik, pasi fati i tij politik është lidhur ngushtë me luftën në Gaza, ndërsa analistët vlerësojnë se ai është në një pozicion më të dobët se kurrë, çka mund ta bëjë më të ndjeshëm ndaj presionit të Shteteve të Bashkuara për pranimin e kushteve të fazës së dytë.
Nga ana tjetër, Hamas dhe grupet e tjera palestineze kanë refuzuar kategorikisht idenë e një kujdestarie të huaj mbi Gazën.
Situata humanitare pritet të përkeqësohet edhe më tej, pasi një stuhi e fuqishme dimërore pritet të godasë Rripin e Gazës në 72 orët e ardhshme, duke rënduar edhe më shumë gjendjen e qindra mijëra palestinezëve të zhvendosur nga sulmet izraelite.
