Qeveria gjermane po shqyrton seriozisht vendosjen e sanksioneve ndaj Izraelit, si pasojë e përkeqësimit të situatës humanitare në Rripin e Gazës.
Kancelari gjerman Friedrich Merz deklaroi se një vendim për këtë çështje pritet të merret së shpejti, pas dorëzimit të një raporti të detajuar nga Ministri i Jashtëm, Johann Wadephul, i cili ndodhet aktualisht në një vizitë zyrtare në Lindjen e Mesme për të vlerësuar gjendjen në terren.
“Gjendja në Gaza është e papranueshme,” u shpreh Merz në një konferencë për shtyp në Berlin. Ai theksoi se Gjermania nuk mund të qëndrojë indiferente ndaj vuajtjeve të civilëve palestinezë dhe se miqtë e Izraelit kanë përgjegjësinë të reagojnë kur standardet humanitare shkelën.
Ministri Wadephul, në deklaratat e tij, ishte edhe më i drejtpërdrejtë, duke paralajmëruar se nëse situata vazhdon të përkeqësohet dhe nuk ka progres të dukshëm në përpjekjet për të ndihmuar civilët, Izraeli rrezikon izolimin ndërkombëtar. Ai shtoi se komuniteti ndërkombëtar nuk mund të qëndrojë pasiv përballë një krize në rritje.
Në një përpjekje për të treguar angazhimin e saj ndaj çështjeve humanitare, Gjermania, së bashku me Mbretërinë e Bashkuar dhe Francën, ka ndërmarrë veprime konkrete për të ndihmuar popullsinë në nevojë. Të tre vendet kanë organizuar një urë ajrore për dërgimin e ndihmave emergjente në Gaza.
Dy avionë ushtarakë gjermanë të tipit A400M kanë realizuar hedhjen ajrore të 34 paletave me ndihma humanitare mbi territorin e Gazës, duke përfshirë ushqime, ujë të pijshëm, ilaçe dhe furnizime të tjera jetike.
Ky operacion është përshëndetur nga organizatat ndërkombëtare të ndihmës humanitare, të cilat kanë bërë thirrje të vazhdueshme për rritjen e mbështetjes dhe sigurimin e aksesit të sigurt në zonat e prekura nga konflikti.
