I dërguari i Shtëpisë së Bardhë, Steve Witkoff, dhe Jared Kushner, dhëndri i presidentit amerikan Donald Trump, po planifikojnë një udhëtim në Moskë për t’u takuar me presidentin rus Vladimir Putin, raportoi Reuters. Takimi synon paraqitjen e propozimeve më të fundit për arritjen e paqes në Ukrainë.
Sipas burimeve, takimi mund të zhvillohet brenda këtij muaji, megjithatë planet mbeten të paqarta dhe mund të shtyhen, veçanërisht për shkak të situatës së tensionuar në Iran. Shtëpia e Bardhë ka bërë të ditur se deri tani nuk ka një takim zyrtar të konfirmuar në axhendë.
Raporti thekson se zyrtarët amerikanë pritet t’i paraqesin presidentit Putin një draft të përditësuar të propozimeve për paqe, i cili përfshin edhe garanci sigurie nga Shtetet e Bashkuara dhe Evropa për çdo marrëveshje të mundshme. Në bisedime parashikohet të trajtohet gjithashtu edhe rindërtimi i Ukrainës pas përfundimit të luftës.
Edhe pse ende nuk ka një konfirmim zyrtar, informacionet e deritanishme tregojnë për një përpjekje të re diplomatike për të avancuar drejt një marrëveshjeje paqeje mes SHBA-së dhe Rusisë për konfliktin në Ukrainë.
