Franca ka konfirmuar se nuk do t’i bashkohet për momentin “Bordit të Paqes” të propozuar nga presidenti amerikan Donald Trump, duke shprehur shqetësime se karta e këtij mekanizmi nuk përputhet me rezolutat e OKB-së për Gazën.
Një zëdhënës i Ministrisë së Jashtme franceze deklaroi se dokumenti nuk i përgjigjet kornizës së miratuar nga Kombet e Bashkuara për zgjidhjen e luftës në Gaza dhe përmban elemente që bien ndesh me Kartën e OKB-së.
“Dokumenti nuk përputhet as me mandatin për Gazën, i cili as nuk përmendet, dhe përmban dispozita që bien në kundërshtim me Kartën e Kombeve të Bashkuara,” tha zëdhënësi Pascal Confavreux.
Qëndrimi i Parisit vjen pas deklaratave të ministrit të Jashtëm Jean-Noël Barrot, i cili theksoi se Franca mbështet përpjekjet amerikane për paqe, por kundërshton krijimin e një organizate të re jashtë strukturave ekzistuese shumëpalëshe.
Vendimi i Francës shton skepticizmin europian ndaj Bordit të Paqes të Trump, ndërsa disa shtete po kërkojnë që çdo nismë për zgjidhjen e konfliktit në Gaza të mbetet brenda kornizës së OKB-së dhe të së drejtës ndërkombëtare.
