Franca ka ndryshuar datat e samitit të ardhshëm të G7-ës për t’u përshtatur me axhendën e Presidentit amerikan, Donald Trump, sipas një zyrtari të lartë amerikan.
Samiti, i cili fillimisht ishte planifikuar për 14-16 qershor, u shty për 15-17 qershor. Ndryshimi u bë që Trump të mund të organizonte një ndeshje artesh marciale të përziera në Shtëpinë e Bardhë më 14 qershor, ditëlindjen e tij të 80-të.
“Partnerët tanë e konsideruan të nevojshme që Presidenti Trump të merrte pjesë në samit. Ata me mirësjellje ndryshuan datat për t’iu përshtatur axhendës së tij,” tha zyrtari i Shtëpisë së Bardhë.
Pallati Elysee tha se “data e samitit u vendos pas konsultimeve me të gjithë vendet e G7”.
G7 përbëhet nga Shtetet e Bashkuara, Japonia, Kanadaja, Franca, Italia, Gjermania dhe Britania e Madhe. Çdo vit vendet organizojnë takime ministrore dhe një samit me krerët e shteteve dhe qeverive.
Analistët thonë se rikthimi i Trump ka ndryshuar mënyrën tradicionale të punës së këtyre samiteve, duke tronditur aleancat historike të SHBA-së.
