Hunter Biden, djali i ish-Presidentit amerikan Joe Biden, ka deklaruar se nuk do t’i kërkojë falje Zonjës së Parë Melania Trump për një koment të diskutueshëm në lidhje me lidhjen e saj të pretenduar me Jeffrey Epstein. Komentet u bënë gjatë një interviste me gazetarin Andrew Callaghan për Channel 5, raporton ABC News.
“Kjo nuk do të ndodhë,” tha Hunter Biden me fjalë të ashpra kur u pyet nëse do të tërhiqte deklaratat që bënte lidhur me njohjen mes Melania Trump dhe bashkëshortit të saj, ish-Presidentit Donald Trump, përmes Epstein-it – një financier i pasur dhe abuzues seksual i dënuar, i cili vdiq në burg në vitin 2019.
Deklarata e Bidenit ndezi polemika të forta në fillim të gushtit, kur ai pretendoi se Epstein kishte qenë ndërmjetësuesi i njohjes mes çiftit Trump. Kjo u kundërshtua menjëherë nga përfaqësuesit ligjorë të Zonjës së Parë. Në një letër zyrtare, avokati i saj e quajti akuzën “tërësisht të pavërtetë dhe jashtëzakonisht provokuese”, duke paralajmëruar padi nëse Hunter nuk kërkonte falje publike.
Në intervistën e fundit, Hunter Biden këmbënguli në qëndrimin e tij, duke cituar burime të ndryshme, përfshirë librin e autorit Michael Wolff, një biograf i njohur i Trump, i cili ka përshkruar lidhjet e ngushta mes Epstein dhe ish-presidentit. “Epstein dhe Trump e njihnin mirë njëri-tjetrin, ata kaluan një kohë të jashtëzakonshme së bashku,” tha Biden.
Donald Trump, nga ana tjetër, e ka quajtur Wolff-in “një gazetar të dorës së tretë” dhe ka hedhur poshtë shumë nga përmbajtjet e shkruara për të dhe familjen e tij.
Në përfundim të intervistës, Hunter Biden ofroi një koment sfidues: “Nëse ata duan një seancë dëgjimore për të sqaruar natyrën e marrëdhënies me Jeffrey Epstein – nëse presidenti dhe zonja e parë duan ta bëjnë këtë – unë jam më shumë se i lumtur t’u ofroj atyre një platformë për ta bërë këtë.”
Ngjarja ka tërhequr vëmendje të madhe publike dhe mund të çojë në përballje ligjore ndërmjet familjes Biden dhe asaj Trump.
