I magjepsur nga shikimi i një vajze të vogël nga Gaza dhe i frymëzuar nga një ninullë për vajzën e tij, Ermal Meta u ngjit mbrëmë në skenën e Festival di Sanremo 2026 me këngën “Stella Stellina”.
Kënga është një dedikim për një vajzë të vrarë në Gaza, duke u kthyer në një homazh për të gjitha viktimat e pafajshme të konfliktit në Palestinë.
Një detaj që tërhoqi vëmendje gjatë performancës ishte emri “Amal” i qëndisur në jakën e këmishës së tij. “Amal” – që në arabisht do të thotë “shpresë” – nuk përfaqëson vetëm një vajzë të vetme, por simbolizon të gjitha fëmijët e pafajshëm të Gazës.
Në rrjetet sociale, Meta shpjegoi: “Protagonistja e ‘Stella Stellina’ është një vajzë e vogël pa emër, por ndoshta i ka të gjithë emrat. Aysha, Amal, Layla, Nour, Hind… Ato mund të jenë bija të askujt, bija të të gjithëve.”
Kjo nuk është hera e parë që artisti prek tema të ndjeshme shoqërore. Pas këngës “Vietato morire”, që trajtonte dhunën në familje, dhe fitores në Sanremo 2018 me “Non mi avete fatto niente” përkrah Fabrizio Moro, Meta rikthehet me një tjetër këngë që trajton plagë të hapura të realitetit aktual.
Edicioni i 76-të i festivalit, i zhvilluar në Teatro Ariston, nisi nën drejtimin e Carlo Conti dhe Laura Pausini, me një homazh për Pippo Baudo dhe një përshëndetje për dirigjentin Peppe Vessicchio. I ftuari special Tiziano Ferro festoi 25-vjetorin e hitit “Perdono”, duke ndezur sallën.
Pas natës së parë, klasifikimi provizor solli surpriza: tri gra në podium dhe në Top 5 emra si Arisa, Fulminacci, Serena Brancale, Ditonellapiaga, si dhe dyshja Fedez & Marco Masini.
Por për shumëkënd, momenti më i fortë i mbrëmjes mbeti “Stella Stellina” – një ninullë që u kthye në një thirrje për kujtesë dhe humanizëm.
