Miliarderi dhe pronari i platformës X (ish-Twitter), Elon Musk, ka mbajtur një fjalim virtual të zjarrtë gjatë marshimit "Bashkoni Mbretërinë", të organizuar nga figura kontroverse Tommy Robinson në qendër të Londrës.
Në një mesazh video drejtuar pjesëmarrësve, Musk akuzoi të majtën për dhunë dhe e quajti "partia e vrasjes", duke iu referuar vrasjes së figurës së djathtë amerikane, Charlie Kirk, gjatë kësaj jave.
"Ka diçka të bukur në të qenit britanik," u shpreh Musk. "Por po përballemi me shumë dhunë nga e majta. Miku ynë Kirk u vra me gjakftohtësi dhe njerëzit e së majtës po e festojnë këtë hapur. E majta është partia e vrasjes dhe e festimit të saj. Mendojeni mirë këtë – me kë kemi të bëjmë."
Përveç kritikave ndaj së majtës, Musk denoncoi edhe qeverinë britanike, duke e akuzuar për një "errozion të shpejtë" të vendit. Komentet e tij vijnë në një kohë tensionesh të rritura politike dhe sociale në Mbretërinë e Bashkuar.
Marshimi, që tërhoqi qindra pjesëmarrës, është pjesë e një vale protestash nacionaliste që synojnë “bashkimin e vendit” kundër, sipas organizatorëve, "kërcënimeve të brendshme dhe të jashtme ndaj identitetit britanik".
Musk, një aleat i njohur i Donald Trump dhe kritik i hapur i lëvizjeve progresiste, e shoqëroi fjalimin e tij me një ripostim të një imazhi të krijuar me inteligjencë artificiale që tregonte turmën e marshimit.
Komentet e tij kanë nxitur reagime të ashpra në rrjetet sociale dhe janë dënuar nga figura të ndryshme publike, të cilat e kanë akuzuar Musk për nxitje të ndarjeve politike dhe përdorim të retorikës ekstreme.
