Guvernatori i Utah, Spencer Cox, ka deklaruar sot se autori i dyshuar për vrasjen e aktivistit konservator amerikan Charlie Kirk, nuk po bashkëpunon me autoritetet dhe deri tani nuk ka pranuar përgjegjësinë për krimin. I dyshuari, 22-vjeçari Tyler Robinson, do të akuzohet zyrtarisht të martën, ndërsa mbetet në paraburgim në Utah. Hetimet janë ende në vijim për të sqaruar motivet që e çuan Robinson të kryente ngjarjen e rëndë. Sipas të dhënave, Robinson dyshohet se u ngjit në çatinë e një ndërtese në Universitetin e Luginës së Utah gjatë një aktiviteti në natyrë, ku qëlloi Kirkun në qafë nga një distancë e gjatë të mërkurën e kaluar, duke i shkaktuar vdekjen.
Guvernatori Cox konfirmoi në një intervistë për emisionin “This Week” të ABC-së se Robinson refuzon të japë dëshmi, por theksoi se personat përreth tij po bashkëpunojnë me autoritetet. “Ai nuk po bashkëpunon, por të gjithë përreth tij po bashkëpunojnë dhe kjo është shumë e rëndësishme”, tha Cox. Një ndër dëshmitarët kryesorë është shoku i dhomës së Robinson, të cilin guvernatori e përshkroi si “një burrë në tranzicion drejt një gruaje” dhe e cilësoi si “jashtëzakonisht bashkëpunues”.
I pyetur nga CNN nëse identiteti gjinor i shokut të dhomës ka ndonjë lidhje me hetimin, guvernatori Cox u përgjigj: “Kjo është ajo që po përpiqemi të kuptojmë tani… Është e lehtë të nxitohemi në përfundime, por kemi gëzhojat, prova të tjera mjeko-ligjore që po na vijnë në dorë, dhe po përpiqemi t’i bashkojmë pjesë-pjesë.”
Hetimet vazhdojnë për të zbuluar motivet dhe rrethanat e plota të kësaj ngjarjeje që ka tronditur opinionin publik në SHBA.
