Egjipti është tronditur nga një video shantazhi e publikuar nga një llogari anonime me emrin “El Malak”, vetëm pak ditë pasi Kajro firmosi marrëveshjen historike të gazit me Izraelin. Videoja tetëminutëshe pretendon të tregojë zëvendësministrin e Brendshëm, gjeneralmajor Khaled Arafa, në një video-thirrje intime, ndërsa një person i maskuar akuzon qeverinë e presidentit Abdel Fattah el-Sisi për “tradhti” ndaj Palestinës.
Autori anonim bëri thirrje për anulimin e kontratës 35 miliardë dollarëshe të gazit me kompanitë izraelite, hapjen e kalimit të Rafah-ut për ndihma dhe lehtësimin e represionit të brendshëm, duke paralajmëruar se mund të zbulojë të tjera skandale.
Skandali shpërtheu menjëherë pas nënshkrimit të marrëveshjes më të madhe energjetike në historinë moderne të Egjiptit, që parashikon importin e 130 miliardë metra kub gazi nga Izraeli deri në vitin 2040. Qeveria e quan një hap jetik për të përballuar krizën energjetike, por kritikët e shohin si varësi të rrezikshme nga një “shtet armik” dhe si tradhti ndaj Gazës së rrethuar.
