Ministri i Jashtëm i Portugalisë, Paulo Rangel, njoftoi të dielën se vendi tani e ka njohur zyrtarisht shtetin e Palestinës. Ai deklaroi se kjo njohje përfaqëson realizimin e një linje themelore dhe të qëndrueshme të politikës së jashtme portugeze. Gjatë një konference për media në selinë e misionit të përhershëm të Portugalisë në Kombet e Bashkuara në Nju Jork, Rangel theksoi se Portugalia mbështet zgjidhjen me dy shtete si rrugën e vetme drejt një paqeje të drejtë dhe të qëndrueshme. Ai shtoi se një armëpushim është urgjent dhe theksoi se Hamasi “nuk mund të ketë asnjë formë kontrolli në Gaza apo jashtë saj”, duke kërkuar gjithashtu lirimin e të gjithë pengjeve.
Ministri i Jashtëm portugez theksoi gjithashtu se njohja e shtetit të Palestinës nuk e fshin katastrofën humanitare në Gaza. Ai dënoi situatën e urisë, shkatërrimin e infrastrukturës dhe zgjerimin e vendbanimeve izraelite në Bregun Perëndimor.
Me këtë hap, Portugalia i bashkohet vendeve të tjera që kanë njohur më parë Palestinën, përfshirë Britaninë, Kanadanë dhe Australinë, të cilat më herët gjatë së dielës zyrtarizuan njohjen e shtetit palestinez.
