Një ngjarje e rëndë është shënuar pasditen e sotme në Milano, ku një 20-vjeçar humbi jetën pasi u qëllua me armën e shërbimit nga një efektiv policie. Sipas mediave italiane, i riu nuk ishte shtetas italian, ndërsa identiteti i tij ende nuk është bërë publik. Ngjarja ndodhi gjatë një operacioni antidrogë të zhvilluar nga policia në zonën e Rogoredos.
Raportohet se viktima ka qenë i armatosur dhe i është afruar patrullës së policisë, duke hapur zjarr në drejtim të saj. Në këto rrethana, efektivët e policisë janë kundërpërgjigjur. Edhe pse shërbimi i urgjencës mbërriti brenda pak minutash, i riu nuk arriti të mbijetojë për shkak të plagëve të marra.
Autoritetet italiane kanë nisur hetimet për të sqaruar plotësisht rrethanat dhe dinamikën e ngjarjes, ndërsa priten informacione të tjera zyrtare në vijim.
