Në qytetin jugor libanez të Nabatieh, një grup punonjësish të urgjencës, të veshur me uniforma identike, u mblodhën rreth dy arkivoleve, duke qarë me dënesë, ndërsa përgatiteshin të varrosnin dy kolegët e tyre të vrarë nga një sulm izraelit.
Sipas Ministrisë së Shëndetësisë së Libanit, Ali Jaber dhe Joud Sleiman u goditën të martën teksa po udhëtonin me një motoçikletë në jug të Libanit për një mision shpëtimi. Të dy mbanin uniforma të shërbimit të urgjencës dhe motoçikleta e tyre ishte e shënuar qartë si ambulancë, me drita sinjalizuese.
“Ai ishte një punonjës i urgjencës që nuk mbante as thikë, shkonte për të shpëtuar dikë tjetër – dhe e godasin dhe e vrasin. Kjo ka ndodhur në më shumë se një sulm dhe në më shumë se një vend”, tha Hassan Jaber, babai i Aliut dhe një zyrtar lokal.
Ministria libaneze e Shëndetësisë thotë se të paktën 42 punonjës të urgjencës janë vrarë nga sulmet izraelite në Liban që nga 2 marsi, kur grupi militant Hezbollah e përfshiu vendin në luftën rajonale duke qëlluar ndaj Izraelit në mbështetje të Iranit.
Sulmet izraelite dhe urdhrat për evakuimin e zonave të gjera në Libanin jugor kanë zbrazur nga banorët shumicën e qytetit Nabatieh.
Pas funeralit, punonjësit e urgjencës u mblodhën në sheshin e qytetit për të shpërndarë ndihma për banorët e paktë që kanë mbetur dhe më pas u kthyen menjëherë në punën e tyre.
Mes tyre ishte edhe Mohammed Sleiman, babai i Joudit dhe drejtues i shërbimit të urgjencës në Nabatieh. Ai akuzoi Izraelin se e kishte vrarë qëllimisht djalin e tij, duke thënë se Izraeli “këmbëngul të dëmtojë, të vrasë, të shtypë dhe të terrorizojë – ndërsa ne këmbëngulim të qëndrojmë”.
