Presidenti amerikan Donald Trump ka autorizuar dërgimin e 300 trupave të Gardës Kombëtare në Çikago, duke argumentuar se krimi në qytet ka dalë jashtë kontrollit. Lëvizja vjen pas përplasjes mes forcave të imigracionit dhe protestuesve, ku një grua e armatosur u qëllua pasi, sipas autoriteteve, automjeti i saj dhe i të tjerëve goditi makinat e policisë, raporton BBC.
Vendimi i presidentit ka ngjallur kritika të forta nga autoritetet lokale dhe shtetërore në Illinois, të cilët e konsiderojnë këtë veprim si tejkalim të kompetencave federale.
“Presidenti po përpiqet të shpikë një krizë që nuk ekziston,”, tha guvernatori i Illinois, JB Pritzker, një nga kritikët më të zëshëm të këtij vendimi.
Ky vendim vjen në të njëjtën kohë kur një gjykatë federale në Portland, Oregon, ndaloi përkohësisht dislokimin e 200 trupave federale në qytet. Gjykatësja Karin Immergut deklaroi se justifikimi i administratës Trump për vendosjen e trupave ishte “i shkëputur nga faktet” dhe përbënte shkelje të Kushtetutës.
Sipas saj, dërgimi i trupave federale pa miratimin e shtetit të Oregonit cënonte sovranitetin e tij dhe rrezikonte ndarjen mes pushtetit civil dhe atij ushtarak.
“Ky veprim nxit tensione dhe shton përplasjet në qytet. Argumentet e administratës rrezikojnë të turbullojnë kufirin mes forcës civile dhe asaj ushtarake, me pasoja të rënda për vendin”, tha gjykatësja Immergut.
