Një ish-shef policie në Florida ka deklaruar se ka marrë një telefonatë nga Donald Trump në vitin 2006, në të cilën presidenti i sotëm i SHBA-së i tha se “të gjithë e dinin” për sjelljen e Jeffrey Epstein. Pretendimi del nga një dokument i FBI-së i publikuar së fundmi nga Departamenti i Drejtësisë amerikan.
Dokumenti përmban përmbledhjen e një interviste të FBI-së në vitin 2019 me ish-shefin e policisë së Palm Beach, Michael Reiter, i cili tha se Trump e kishte telefonuar pasi policia nisi një hetim për Epstein. Sipas Reiter, Trump i kishte thënë: “Faleminderit Zotit që po e ndaloni, të gjithë e dinin se çfarë po bënte.”
Në të njëjtën telefonatë, Reiter pretendon se Trump i tha se kishte përjashtuar Epstein nga klubi Mar-a-Lago dhe se “njerëzit në New York e dinin që ai ishte i neveritshëm”. Ai gjithashtu tha se Trump e quajti Ghislaine Maxwell “operativen” e Epstein-it dhe e përshkroi atë si “të ligë”, duke i kërkuar policisë të fokusohej tek ajo. Maxwell u dënua në vitin 2021 për rekrutimin e vajzave të mitura për Epstein.
Sipas dokumentit të FBI-së, Reiter tha se Trump ishte “një nga njerëzit e parë” që telefonoi policinë e Floridës kur mësoi për hetimin ndaj Epstein.
Trump ka mohuar vazhdimisht se ka ditur për krimet e Epstein-it. Në vitin 2019, pas arrestimit të financierit për trafik seksual, ai u tha gazetarëve: “Nuk kisha asnjë ide. Nuk kam folur me të prej shumë vitesh.”
Një zyrtar i Departamentit të Drejtësisë i tha BBC-së se nuk kanë prova që e konfirmojnë telefonatën e pretenduar. Ndërkohë, zëdhënësja e Shtëpisë së Bardhë, Karoline Leavitt, deklaroi se telefonata “mund të ketë ndodhur ose jo”, por se nëse ka ndodhur, ajo përputhet me qëndrimin e Trump se ai e dëboi Epstein-in nga Mar-a-Lago sepse “ishte një njeri i neveritshëm”.
Në vitin 2006, policia e Palm Beach po hetonte Epstein për shfrytëzim seksual të të miturve, por çështja më vonë përfundoi me një marrëveshje të diskutueshme me prokurorët federalë në 2008.
Zbulimet vijnë në një moment kur Maxwell po dëshmonte në Kongresin amerikan, ku ajo refuzoi t’u përgjigjej pyetjeve duke u mbrojtur me Amendamentin e Pestë. Avokati i saj tha se ajo do të fliste nëse Trump i jepte falje presidenciale — gjë që Trump ka deklaruar se nuk e ka menduar.
