Një hetim i gjerë ndërkombëtar ka zbuluar se një dhurues sperme, i cili mbante pa dijeninë e tij një mutacion gjenetik që rrit ndjeshëm rrezikun e zhvillimit të kancerit, ka bërë të mundur lindjen e të paktën 197 fëmijëve në mbarë Europën. Disa prej tyre tashmë kanë humbur jetën, ndërsa shumica e fëmijëve që trashëgojnë mutacionin përballen me rrezik të lartë për zhvillimin e kancerit gjatë jetës.
Edhe pse sperma e tij nuk është shitur në klinikat britanike, BBC konfirmoi se një numër shumë i vogël familjesh në Mbretërinë e Bashkuar ka përdorur spermën e dhuruesit gjatë trajtimeve për fertilitet në Danimarkë.
European Sperm Bank në Danimarkë, që ka shpërndarë spermën, shprehu “ngushëllimet më të thella” për familjet e prekura dhe pranoi se në disa shtete sperma e dhuruesit është përdorur më shumë se sa lejohet, duke krijuar një numër tepër të lartë shtatzënish.
Hetimi u realizua nga 14 radiotelevizione publike, përfshirë BBC-në, nën kuadër të Rrjetit të Gazetarisë Investigative të Unionit Evropian të Transmetimeve. Ai zbuloi se dhuruesi kishte filluar të paguhej për dhurimin e spermës në vitin 2005, ndërsa materialet e tij u përdorën për rreth 17 vite.
Dhuruesi rezulton i shëndetshëm dhe kishte kaluar të gjitha kontrollet e zakonshme. Por një mutacion i ndodhur para lindjes në disa nga qelizat e tij kishte dëmtuar gjenin TP53, i cili mbron trupin nga zhvillimi i kancerit. Ndërsa pjesa më e madhe e trupit të tij nuk e mbart mutacionin, deri në 20% e spermës së prodhuar prej tij e përmbante atë.
Si rezultat, çdo fëmijë i konceptuar nga spermatozoidet e prekura ka trashëguar mutacionin në të gjitha qelizat e trupit, duke u ekspozuar ndaj një rreziku tejet të lartë për kancer gjatë jetës.
