Departamenti i Drejtësisë i Shtetet e Bashkuara i ka dërguar Kongresit të SHBA një listë me personat e konsideruar “politikisht të ekspozuar”, të përmendur në miliona faqe dokumentesh që lidhen me hetimet ndaj të dënuarit për krime seksuale Jeffrey Epstein. Lista, e përfshirë në një letër gjashtëfaqëshe, është siguruar nga CNN dhe është firmosur nga zëvendësprokurori i përgjithshëm Todd Blanche.
Sipas dokumentit, emrat janë përfshirë pavarësisht kontekstit dhe pa sqaruar shkallën e lidhjes apo kontaktit të tyre me Epstein. Letra i është dërguar drejtuesve të komisioneve të drejtësisë në Dhomën e Përfaqësuesve dhe Senat, në zbatim të ligjit për transparencën e dosjeve Epstein, të miratuar nga Kongresi. 
Lista përfshin figura të njohura politike, kulturore dhe ekonomike. Megjithatë, autoritetet theksojnë se asnjë person tjetër përveç vetë Epstein dhe bashkëpunëtores së tij Ghislaine Maxwell nuk është akuzuar penalisht në lidhje me krimet e hetuara. 
Publikimi i listës ka shkaktuar reagime të forta në radhët e ligjvënësve amerikanë. Deputeti Ro Khanna, një nga autorët e ligjit që detyroi publikimin e dokumenteve, ka akuzuar Departamentin e Drejtësisë se po “ngatërron qëllimisht ujërat” duke mos bërë dallimin mes personave të dyshuar dhe atyre që përmenden thjesht në dokumente apo email-e. Ndërkohë, deputetja republikane Nancy Mace ka pretenduar se lista e publikuar ka emra të munguar. 
Si në korrespondencat e mëparshme me Kongresin, Departamenti i Drejtësisë ka justifikuar redaktimet e shumta në dokumente me nevojën për të mbrojtur proceset e brendshme hetimore, komunikimet e mbrojtura ligjërisht dhe privatësinë e viktimave. 
Publikimi i këtyre dokumenteve pritet të mbajë të ndezur debatin politik në Shtetet e Bashkuara, ndërsa ligjvënësit kërkojnë më shumë qartësi mbi mënyrën se si janë përzgjedhur dhe paraqitur emrat në listë.
