Të rrisim apo jo tatimet? Gjermania përballet me një debat të nxehtë për taksat ndaj të pasurve, në përpjekje për të mbuluar një boshllëk buxhetor prej mbi 30 miliardë eurosh.
Prej disa javësh, në Gjermani po zhvillohet një debat i fortë rreth mundësisë së rritjes së tatimeve për shtresat më të pasura të shoqërisë. Qëllimi: mbyllja e një boshllëku buxhetor që tejkalon 30 miliardë euro.
Ministri i Financave, Lars Klingbeil, e hodhi për herë të parë idenë në një intervistë për ZDF në mesin e gushtit, por hasi menjëherë në kundërshtimin e fortë të partnerëve konservatorë të koalicionit, veçanërisht nga CDU/CSU.
Në një paraqitje të fundit në emisionin "Bericht aus Berlin", Klingbeil sqaroi dhe mbrojti qëndrimin e tij. Ai theksoi se deficiti buxhetor i parashikuar për vitin 2027 është thelluar edhe më tej, për shkak të projekteve si “pensioni i nënave” dhe fondet kompensuese për komunat në kuadër të iniciativës “stimulimi i rritjes”.
“Nuk besoj se ka pasur ndonjëherë një qeveri federale që të përballet me nevojën për të mbuluar një boshllëk kaq të madh në buxhet,” deklaroi ai. “Unë mendoj se duhet të mbajmë të hapura të gjitha opsionet, derisa të arrijmë në pikën ku mund të themi me bindje: 30 miliardët janë siguruar, dhe boshllëku është mbyllur.”
