NJU JORK – Tre kandidatët kryesorë për bashkinë e qytetit më të madh të Shteteve të Bashkuara, Zohran Mamdani (Demokrat), Andrew Cuomo (i pavarur) dhe Curtis Sliwa (Republikan), u përplasën ashpër në një debat televiziv që shënoi momentin më të fortë të garës zgjedhore deri tani. Përballja, e ndjekur nga miliona shikues, u fokusua në çështjet ekonomike, krizën e kostos së jetesës, përvojën në drejtim dhe qëndrimet e kandidatëve për konfliktin në Gaza.
Cuomo, ish-guvernatori i Nju Jorkut, sulmoi rivalin e ri progresist Zohran Mamdani duke e cilësuar “të papërgatitur për të drejtuar një qytet me 300 mijë punonjës dhe buxhet 115 miliardë dollarësh”. Ai e akuzoi për mungesë përvoje në administrim dhe vendimmarrje gjatë krizave: “Kjo nuk është punë për dikë që nuk ka asnjë përvojë financiare. Çdo ditë mund të përballesh me një uragan, një pandemi, apo një situatë emergjente si 11 shtatori,” tha Cuomo.
Mamdani iu kundërpërgjigj me tone të forta, duke e akuzuar Cuomo-n për hipokrizi dhe për dështimet gjatë pandemisë, sidomos në trajtimin e azileve të pleqve: “Nëse kemi një pandemi shëndetësore, pse njujorkezët do t’i ktheheshin një guvernatori që dërgoi të moshuarit drejt vdekjes? Atë që unë nuk e kam në përvojë, e kompensoj me integritet. Atë që ti nuk e ke në integritet, nuk mund ta kompensosh kurrë me përvojë.”
Në mes të debatit, u hap edhe tema e politikës së jashtme, me fokus tek konflikti në Gaza. Curtis Sliwa, kandidati republikan, e përdori temën për të lavdëruar Donald Trumpin, duke thënë se “sjellja e paqes në Gaza” ishte një arritje që meriton njohje. “Zohran duket i paaftë të lavdërojë presidentin tonë, dhe ti, Andrew, ishe po aq i paaftë. Të dy vuani nga urrejtja ndaj një njeriu që solli paqe,” tha Sliwa.
Mamdani, me origjinë indiane dhe një nga zërat më të majtë të Partisë Demokratike, mbrojti qëndrimin e tij pro armëpushimit dhe ndihmës humanitare në Gaza, duke theksuar se “paqja nuk mund të arrihet pa drejtësi”. Ai kërkoi më shumë transparencë në mënyrën se si SHBA financon konfliktet ndërkombëtare dhe paralajmëroi se “paratë e taksapaguesve nuk duhet të përdoren për të ushqyer luftëra.”
Sipas The Guardian dhe Reuters, debati solli përplasjen më të ashpër ideologjike të deritanishme në fushatë, ku përballeshin vizioni progresist i Mamdanit, administrata tradicionale e Cuomo-s dhe mesazhi konservator i Sliwa-s. Analistët e konsiderojnë këtë debat si një pikë kthese që do të përcaktojë drejtimin e garës për qytetin simbol të Shteteve të Bashkuara.
