Një operacion masiv antidrogë ka kthyer qytetin në një fushë beteje, me mbi 100 të vdekur – ndërsa autoritetet konfirmojnë zyrtarisht 64 viktima, përfshirë 4 oficerë policie.
Operacioni më i përgjakshëm në historinë e shtetit u zhvillua në favelat e Alemão dhe Penha, me mbi 2,500 forca policore që synonin rrjetin kriminal Comando Vermelho (Komanda e Kuqe), fraksioni më i fuqishëm i trafikut të drogës në Rio.
Kriminelët reaguan me dhunë ekstreme – dronë të armatosur me granata, pushkë automatike, autobusë të rrëmbyer për të bllokuar rrugët. Shpërthime dhe shkëmbime zjarri u dëgjuan pa ndërprerje, ndërsa banorët e favelave u strukën nëpër shtëpi. Sipas mediave lokale, shumë trupa janë gjetur me plagë në pjesën e pasme të kokës, duke ngritur dyshime për ekzekutime pa gjyq.
Guvernatori Cláudio Castro e quajti aksionin “luftë kundër narko-terroristëve” dhe kërkoi ndihmë nga qeveria federale. Ndërkohë, Presidenti në detyrë Geraldo Alckmin thirri një mbledhje urgjente për të diskutuar mundësinë e ndërhyrjes ushtarake.
Rio është paralizuar – 45 shkolla të mbyllura, transporti publik në kaos, fluturime të pezulluara dhe mijëra qytetarë të bllokuar.
Autoritetet paralajmërojnë se numri i viktimave mund të rritet, ndërsa drejtuesi i Comando Vermelho, Edgar Alves Andrade (Doca da Penha), mbetet ende i lirë.
