Një re e dendur tymi po përhapet mbi zonat përreth Teheranit pas një sulmi të kryer të shtunën nga forcat izraelite dhe amerikane ndaj objekteve të naftës në periferi të kryeqytetit iranian.
Sipas raportimeve nga terreni, sulmi ka ngritur shqetësime serioze për ndotje të ajrit, si edhe për kontaminim të mundshëm të tokës dhe ujit, që mund të ketë pasoja afatgjata për rreth 14 milionë banorët e Teheranit.
Ndërkohë janë raportuar shpërthime edhe në disa qytete të tjera, përtej kryeqytetit, përfshirë një kompleks industrial në jug të Teheranit, si dhe në Isfahan, Kashan, Ahvaz dhe Saqez. Që nga fillimi i luftës, më shumë se 200 qytete iraniane janë goditur nga sulme të SHBA-së dhe Izraelit.
Bilanci i viktimave vazhdon të rritet. Deri tani raportohen mbi 1,300 të vrarë, ndërsa autoritetet paralajmërojnë se numri mund të shtohet edhe më tej.
Ndërkohë nuk ka shenja për ulje të tensioneve. Trupat e Gardës Revolucionare Iraniane (IRGC) kanë njoftuar nisjen e valës së 40-të të sulmeve hakmarrëse.
Sipas një zyrtari iranian të sigurisë, konflikti rajonal pritet të hyjë së shpejti në një fazë të re, ndërsa paralajmërohet se përveç Ngushticës së Hormuzit, një nga pikat më strategjike për tregtinë globale të energjisë, edhe një ngushticë tjetër e rëndësishme në rajon mund të përballet me të njëjtin fat, duke rritur frikën për përshkallëzim të mëtejshëm të luftës në Lindjen e Mesme.
