Një i ri 22-vjeçar nga Utah, Tyler Robinson, është vënë në pranga nga FBI-ja, pasi dyshohet të jetë autor i atentatit me snajper ndaj aktivistit politik Charlie Kirk, ngjarje që ndodhi të mërkurën në ambientet e Universitetit të Utah.
Sipas burimeve të hetimit, një nga plumbat e përdorur në atentat kishte të gdhendur shprehjen “Bella Ciao”, një detaj që ngre shumë pikëpyetje për motivet dhe qëllimet e autorit. Ende nuk është sqaruar nëse ky ishte plumbi që goditi për vdekje Kirk-un. Presidenti i Shteteve të Bashkuara, Donald Trump, konfirmoi arrestimin gjatë një interviste televizive, duke shtuar se Robinson kishte pranuar krimin përpara babait të tij, i cili më pas e ka bindur të birin që të dorëzohej. Hetuesit po analizojnë gjithashtu postime të të dyshuarit në platformën Discord, ku ai fliste për një plan të detajuar për të vrarë Kirk-un.
Pamjet e sigurisë tregojnë të dyshuarin duke arritur në zonën e kampusit me një makinë Dodge Challenger rreth katër orë para ngjarjes. Ai shihej i veshur me rroba të thjeshta – një bluzë kafe, pantallona të shkurtra të çelëta, një kapele të zezë me logo të bardhë dhe atlete me ngjyra. Guvernatori i Utah, Spencer Cox, deklaroi se gjatë arrestimit, veshja e Robinson përputhej me atë që ishte parë në kamerat e sigurisë.
Hetimet e mëtejshme për motivet dhe rrethanat e atentatit janë ende në zhvillim, ndërsa autoritetet federale dhe lokale vazhdojnë mbledhjen e provave dhe intervistimin e dëshmitarëve për të përcaktuar përgjegjësinë dhe mekanizmat e sakta të ngjarjes.
