Presidenti i Këshillit Europian, Antonio Costa, ka shprehur “solidaritetin e plotë” të Bashkimit Europian me Spanjën pas kërcënimeve të presidentit amerikan Donald Trump.
Costa bëri të ditur se ka zhvilluar një bisedë telefonike me kryeministrin spanjoll Pedro Sanchez për të shprehur mbështetjen e BE-së.
“Sapo zhvillova një telefonatë me Pedro Sanchez për të shprehur solidaritetin e plotë të BE-së me Spanjën”, shkroi Costa në rrjetin social X.
Ai theksoi se Bashkimi Europian do të sigurojë gjithmonë mbrojtjen e interesave të vendeve anëtare dhe riafirmoi angazhimin e bllokut për respektimin e së drejtës ndërkombëtare dhe rendit global të bazuar në rregulla.
Reagimi i Brukselit vjen pasi Trump ka kërcënuar të ndërpresë të gjitha marrëdhëniet tregtare me Spanjën, pasi Madridi refuzoi të lejojë përdorimin e bazave ushtarake amerikane për misione që lidhen me sulmet ndaj Iranit.
