Bashkimi Europian dhe aleatët e tij më të ngushtë po marrin masa të jashtëzakonshme për të shmangur një tjetër përplasje diplomatike mes Donald Trump dhe Volodymyr Zelensky gjatë vizitës së presidentit ukrainas në Uashington, e cila pritet të zhvillohet nesër.
Pas skenave të tensionuara në Shtëpinë e Bardhë në shkurt – kur Trump i kërkoi Zelenskyt të “bëjë marrëveshje me Rusinë ose ne tërhiqemi” dhe e akuzoi se “po luan kumar me Luftën e Tretë Botërore” – udhëheqësit evropianë po ndërhyjnë për të garantuar një përfaqësim më të gjerë dhe të qëndrueshëm në negociata.
Sipas burimeve diplomatike, presidentja e Komisionit Evropian Ursula von der Leyen, kryeministri britanik Keir Starmer, kryeministrja italiane Giorgia Meloni, si dhe sekretari i përgjithshëm i NATO-s Mark Rutte dhe presidenti finlandez Alexander Stubb pritet ta shoqërojnë Zelenskyn në takimin me Trump.
Kryeministri i Mbretërisë së Bashkuar, Keir Starmer, ka konfirmuar pjesëmarrjen e tij, ndërsa kancelari gjerman Friedrich Merz e bëri të ditur këtë mëngjes se do të jetë gjithashtu prezent në Shtëpinë e Bardhë.
Ky mobilizim europian vjen si përpjekje për të shmangur një përsëritje të incidentit të fundit, ku Zelensky u largua herët nga Shtëpia e Bardhë pas një përballjeje të fortë me Trumpin, gjatë një pritjeje të organizuar nga zëvendëspresidenti JD Vance, i njohur për qëndrimin skeptik ndaj ndihmës për Ukrainën.
Me tensionet që mbeten të larta mbi të ardhmen e mbështetjes amerikane për Kievin, prania e liderëve evropianë synon të japë një mesazh të qartë uniteti dhe mbështetjeje për Ukrainën – por edhe të qetësojë tonet gjatë takimeve të ndjeshme politike që pritet të zhvillohen nesër në Uashington.
