Sipas The Times, vendet e Bashkimit Evropian po i kërkojnë presidentit amerikan Donald Trump të vendosë avionë luftarakë F-35 në Rumani, si pjesë e garancive të sigurisë që SHBA mund t’i japë për t’i dhënë fund luftës në Ukrainë. Diskutimet u zhvilluan në Uashington mes gjeneralëve amerikanë dhe homologëve nga Britania, Gjermania, Franca, Finlanda e Italia, ndërkohë që NATO po zgjeron bazën ajrore Mihail Kogălniceanu – e cila pritet të bëhet më e madhja në Evropë.
BE kërkon gjithashtu garanci për furnizimin e Ukrainës me raketa mbrojtëse Patriot dhe Nasams, përdorimin e satelitëve amerikanë për zbulim, si dhe ngritjen e avionëve spiunë mbi Detin e Zi. Britania ka ofruar të vendosë avionë Typhoon dhe deri në 5 mijë trupa për stërvitjen e ushtrisë ukrainase, ndërsa Franca, Kanadaja dhe Australia pritet të dërgojnë gjithashtu personel ushtarak.
Nga ana tjetër, Rusia paralajmëron se kundërshton çdo vendosje trupash perëndimore dhe kërkon të ketë të drejtë vetoje mbi mbështetjen ushtarake ndaj Ukrainës. Sergei Lavrov deklaroi se negociatat aktuale të NATO-s janë një “rrugë pa krye”, duke shtuar se Kremlini është i hapur për bisedime të reja, por vetëm nëse ato përgatiten me kujdes maksimal.
