Atmosfera në Iran është bërë “jashtëzakonisht mbytëse”, thotë një grua iraniane nga Teherani, e cila ka arritur të lidhet me internetin vetëm së fundmi, që prej fillimit të luftës.
Në një dëshmi për BBC, ajo përshkruan një situatë të mbushur me frikë dhe pasiguri.
“Atmosfera në Iran është jashtëzakonisht mbytëse. Gjithmonë ka qenë shtypëse, por tani i janë shtuar edhe frika dhe terrori”, shprehet ajo.
Sipas saj, në ditën e parë kur nisi lufta, shumica e njerëzve u zgjuan nga zhurma e shpërthimeve.
“Rreth një orë më vonë interneti u ndërpre dhe ne vazhduam të ndiqnim lajmet përmes televizionit satelitor”, thotë ajo.
Po atë ditë nisën edhe radhët e gjata për karburant, ndërsa në rrugë u shfaqën shpejt forcat paraushtarake të lidhura me regjimin.
Banorja tregon se vonë në mbrëmje u njoftua se udhëheqësi suprem i Iranit, Ali Khamenei, ishte vrarë.
“Sapo u dha lajmi, të gjithë fqinjët dolën në ballkone ose në dritare dhe filluan të festonin”, rrëfen ajo. “Por më pas u rikthyen paraushtarakët dhe njerëzit u detyruan të heshtnin”.
Ajo shton se qytetarët marrin çdo ditë shumë mesazhe me paralajmërime, kërcënime ose lajme të rreme, ndërsa çdo natë mbështetësit e qeverisë organizojnë procesione në rrugë, herë për zi e herë për festime.
“E gjithë situata të jep ndjesinë sikur asgjë në këtë vend nuk na përket. Është sikur jemi të huaj në qytetin tonë”, përfundon ajo.
