Miliona fëmijë dhe adoleshentë nën moshën 16 vjeç në Australi kanë humbur aksesin në rrjetet sociale, pas hyrjes në fuqi të një ndalimi historik, i pari i këtij lloji në botë. Ligji i ri detyron platforma si Instagram, Facebook, Threads, X, Snapchat, TikTok, YouTube, Reddit, Twitch dhe të tjera që të zbatojnë kufizimin.
Prindërit dhe fëmijët nuk do të ndëshkohen për shkeljen e ndalimit, por kompanitë teknologjike përballen me gjoba që arrijnë deri në 49.5 milionë dollarë australianë për çdo shkelje.
Qeveria australiane thotë se masa synon mbrojtjen e të rinjve nga përmbajtjet e dëmshme online, ndërsa kritikët paralajmërojnë se ndalimi mund të izolojë fëmijët më vulnerabël dhe t’i shtyjë drejt hapësirave të parregulluara të internetit.
Ky vendim po ndiqet me shumë vëmendje nga vendet e tjera, ndërsa ende nuk është e qartë se si do të matet suksesi i tij.
