Një nga figurat më të rëndësishme që mori pjesë në samitin e fundit të Organizatës së Bashkëpunimit të Shangait (SCO) në Kinë ishte kryeministri indian, Narendra Modi. Pjesëmarrja e tij nënvizon afrimin e Indisë me Moskën dhe Pekinin, një orientim që, sipas analistëve të Sky News, lidhet ngushtë me mënyrën se si Nju Delhi u trajtua nga administrata e Presidentit amerikan Donald Trump.
Gjatë mandatit të tij, Trump vendosi një tarifë prej 25% mbi importet indiane të naftës ruse me çmim të zbritur, duke e çuar totalin e detyrimeve në 50% – ndër më të lartat në botë. Në vend që ta ndëshkonte Indinë, kjo politikë vetëm sa e shtyu atë më pranë Rusisë dhe Kinës.
Ish-këshilltari i Trump për tregtinë, Peter Navarro, madje e quajti luftën në Ukrainë si “lufta e Modit”, duke pretenduar se “rruga drejt paqes kalon, të paktën pjesërisht, përmes Nju Delhit”. Navarro shtoi se “lobet e mëdha të naftës në Indi e kanë kthyer demokracinë më të madhe në botë në një qendër të madhe për rafinimin dhe ‘pastrimin’ e naftës ruse – në shërbim të Kremlinit”.
Nga vetëm 3% e importeve të saj të naftës në vitin 2021, sot India e siguron mbi 40% të saj nga Rusia, duke e bërë Moskën furnizuesin më të madh të vendit. Ky ndryshim i madh tregon orientimin e ri strategjik të Nju Delhit, i cili ndjen pasiguri dhe mungesë besueshmërie nga SHBA, sidomos gjatë presidencës së Trump.
Në këtë sfond, India ka rikalibruar marrëdhëniet e saj ndërkombëtare, duke u afruar më shumë me fuqitë lindore – Rusinë dhe Kinën. Në prag të samitit të SCO-së, janë zhvilluar disa takime të rëndësishme mes ministrave të jashtëm të Indisë, Rusisë dhe Kinës, që sinjalizojnë një koordinim gjithnjë e më të ngushtë mes tyre në arenën globale.
Një aleancë e vjetër me Moskën
Marrëdhëniet mes Indisë dhe Rusisë kanë një histori të gjatë. Gjatë Luftës së Ftohtë, India ishte një aleate e ngushtë e Bashkimit Sovjetik, ndërsa SHBA mbështeste Pakistanin, rivalin historik të saj. Këto lidhje, sidomos në sektorin e mbrojtjes, janë forcuar me kalimin e viteve.
Sipas të dhënave të Institutit Ndërkombëtar të Kërkimeve për Paqen në Stokholm (SIPRI), rreth 65% e armatimeve të Indisë në dy dekadat e fundit kanë ardhur nga Rusia. Edhe pse India ka nisur të diversifikojë furnizuesit e saj duke blerë teknologji ushtarake edhe nga vendet perëndimore, ky është një proces i ngadaltë dhe i ndërlikuar, veçanërisht përsa i përket transferimit të teknologjisë. Në një botë gjithnjë e më të polarizuar, India duket se po orienton politikën e saj të jashtme më shumë drejt lindjes, ku përveç avantazheve ekonomike, nuk ndjen të njëjtin presion politik që shpesh vjen nga aleatët perëndimorë.
Ky ndryshim i balancave ndërkombëtare është një sinjal i qartë se pozicionimi i Indisë në arenën globale po evoluon, duke reflektuar sfidat e reja dhe realitetet e një bote gjithnjë e më të ndarë në blloqe gjeopolitik
