Këshilli i Sigurimit i Kombeve të Bashkuara ka nisur një seancë të jashtëzakonshme për të diskutuar situatën në Venezuelë, mes tensioneve të forta diplomatike pas veprimeve të fundit të Shteteve të Bashkuara.
Ish-këshilltari britanik për sigurinë kombëtare, Sir Mark Lyall Grant, ka deklaruar se Mbretëria e Bashkuar dhe vendet e tjera evropiane ndodhen në një “pozitë shumë të vështirë” në këtë takim. Duke folur për BBC Radio 4, ai tha se veprimet e SHBA-së janë “pothuajse jo të ligjshme” sipas së drejtës ndërkombëtare.
Sipas Grant, Franca dhe Mbretëria e Bashkuar do të jenë “shumë të kujdesshme” që në Këshillin e Sigurimit të mos hapin debatin mbi ligjshmërinë e operacionit amerikan, duke pritur që fokusi i tyre të jetë më tepër tek ajo çfarë do të ndodhë më tej me Venezuelën dhe stabilitetin e rajonit.
Seanca emergjente e Këshillit të Sigurimit është thirrur me axhendën “kërcënime ndaj paqes dhe sigurisë ndërkombëtare”, ndërsa pritet që përplasjet politike mes fuqive të mëdha të dominojnë diskutimet.
