Tregjet financiare kanë reflektuar sërish pasiguri këtë të premte, ndërsa paralajmërimet për një ndërprerje të mundshme të eksportit të energjisë nga vendet e Gjirit Persik kanë rritur tensionin tek investitorët.
Pas një nisjeje me rritje të lehtë, e ndikuar nga disa lajme nga SHBA që kishin ngadalësuar çmimet e lëndëve të para, tregjet u kthyen shpejt drejt kujdesit. Frika për një ndërprerje të furnizimit me energji nga rajoni i Gjirit Persik çoi në mbyllje negative të bursave evropiane.
Në këtë klimë pasigurie, çmimi i naftës u rrit deri në 90 dollarë për fuçi.
Agjencia Ndërkombëtare e Energjisë (IEA) u përpoq të qetësonte tregjet duke deklaruar se furnizimet globale janë të mjaftueshme.
Ndërkohë, situata u tensionua më tej pasi gjiganti i transportit detar Maersk njoftoi pezullimin e të gjitha transporteve nga Gjiri Persik drejt Lindjes së Mesme dhe Evropës.
