Një sulm me thikë në një tren të linjës Doncaster–Londër mbrëmjen e së shtunës ka lënë 11 persona të plagosur, ndërsa dy prej tyre janë në gjendje të rrezikshme për jetën. Incidenti ndodhi pasi treni kaloi nëpër Peterborough, duke shkaktuar panik mes pasagjerëve.
Policia britanike arrestoi dy shtetas britanikë në të 30-at, të dyshuar për tentativë vrasjeje. Sipas autoriteteve, nuk ka prova që ngjarja lidhet me terrorizmin. Dëshmitarët thanë se njëri prej tyre u neutralizua me Taser teksa mbante thikë.
Treni u ndal urgjentisht në stacionin Huntingdon, ku forcat e armatosura u futën në bord dhe ndaluan të dy të dyshuarit brenda pak minutash. Të plagosurit u transportuan në spital në Cambridge, ndërsa disa pasagjerë morën ndihmë mjekësore në vend.
Kryeministri britanik Sir Keir Starmer e cilësoi ngjarjen “tronditëse” dhe kërkoi hetim të plotë. Autoritetet vazhdojnë të marrin në pyetje dëshmitarë dhe të verifikojnë motivet e sulmit.
“Mendimet e mia janë me të prekurit dhe falënderoj shërbimet e emergjencës për reagimin e tyre”, tha ai në një mesazh të postuar në platformën X.
